வடகிழக்கை இணைக்கச் சொல்ல விக்னேஸ்வரனுக்கு அருகதை இல்லை!

Tamil Breaking News Today – தமிழ் செய்திகள் இன்று


வடகிழக்கை இணைக்கச் சொல்ல விக்னேஸ்வரனுக்கு அருகதை இல்லை!

கிழக்கின் எழுச்சி என்பது பிரதேசவாத நோக்கம் கொண்ட ஒரு சிந்தனையல்ல, அது ஸ்ரீலங்கா முஸ்லிம் காங்கிரஸ் தலைமையை நம்பி ஏமாந்த மக்களின் உண்மையான உணர்வலையாகும் என அகில இலங்கை மக்கள் காங்கிரஸின் பிரதித்தலைவர் கலாநிதி. ஏ.எம்.ஜெமீல் தெரிவித்தார்.

நேற்று கொழும்பில் இடம் பெற்ற நூல் வெளியீட்டு விழாவில் கலந்து கொண்டு உரையாற்றுகையிலேயே அவர் இதனைக் குறிப்பிட்டுள்ளார்.

தொடர்ந்தும் அவர் அங்கு உரையாற்றுகையில்,

கிழக்கு மாகாண முஸ்லிம்கள் ஒருபோதும் பிரதேசவாத சிந்தனை கொண்டவர்களாகஇருந்ததில்லை. முஸ்லிம் காங்கிரஸின் ஸ்தாபகத் தலைவர் எம்.எச்.எம்.அஷ்ரப் அவர்கள் மரணித்த பின்னர் தென்னிலங்கையைச் சேர்ந்த ரவூப் ஹக்கீம், கிழக்கு முஸ்லிம்களின் ஏகமனதாக அங்கீகாரத்துடன் தலைவராக்கப்பட்டதை நான் இங்கு சுட்டிக்காட்ட விரும்புகின்றேன்.

அப்படி எந்த விதமான தனிப்பட்ட எதிர்பார்ப்புமின்றி தலைவராக்கப்பட்ட ரவூப் ஹக்கீமை கடந்த ஒன்றரை தசாப்த காலமாக தமது சமூகத் தலைவனாக ஏற்றிருந்த கிழக்கு முஸ்லிம்கள், அவர் இந்த சமூகத்திற்கு எதுவும் செய்யவில்லை என்பதையும் சமூக நலன் சார்ந்த விடயங்களில் அத்தலைமைக்கு எவ்வித அக்கறையும் கிடையாது என்பதையும் உணர்ந்து கொண்டதன் வெளிப்பாடே கிழக்கின் எழுச்சியாக உருவெடுத்திருக்கிறது.

அந்த உணர்வலையை எவரும் குறைத்து மதிப்பிட முடியாது. முஸ்லிம் சமூகத்திற்கான தலைமை என்பது நாட்டின் எந்த மூலை முடுக்கில் இருந்தும் உருவாகலாம்.

அது கிழக்கில் இருந்துதான் வர வேண்டும் என்று கிழக்கு மக்கள் கோஷமிடவில்லை. சமூகத்தின் உரிமைகள், பாதுகாப்பு மற்றும் நலன்களை உறுதிப்படுத்துவதில் ரவூப் ஹக்கீமின் இயலாமை வெளிப்பட்டுள்ளதன் எதிரொலிதான் கிழக்கின் எழுச்சி என்பதை அனைவரும் புரிந்து கொள்ள வேண்டும்.

எமது மூத்த எழுத்தாளர், சமூக ஆய்வாளர் எழுதியுள்ள முஸ்லிம் அரசியலின் இயலாமை எனும் நூல் அதனையே பறைசாற்றுகின்றது. இன்று வடக்கு- கிழக்கு மாகாணங்கள் இணைக்கப்பட வேண்டும் என முதலமைச்சர் விக்னேஸ்வரன் ஒற்றைக்காலில் நிற்கிறார். தமிழ் தேசியக் கூட்டமைப்பும் அதனையே வலியுறுத்துகின்றது.

அதற்கான செயற்பாடுகளும் திரைமறைவில் நடத்தப்பட்டு வருகின்றன. ஆனால் இந்த விடயத்தில் முஸ்லிம் காங்கிரஸ் தலைமை வாய் மூடி மௌனியாக இருந்து வருகின்றது.

ஏன் இந்த இயலாமை, இந்த ஆபத்தை உணர்ந்தே கிழக்கு முஸ்லிம்கள் இன்று கொதித்துக் கொண்டிருக்கிறார்கள். இந்த அபாயகரமான சூழ்நிலையில் இருந்து முஸ்லிம்களை காப்பாற்றுவது எப்படி? எமது அடுத்த சந்ததியினரின் எதிர்காலம் என்ன என்பது தொடர்பில் கிழக்கு மாகாணத்திலுள்ள சிவில் சமூக அமைப்புகள் சிந்திக்க தொடங்கியுள்ளன.

வடக்கையும் கிழக்கையும் மீள இணைக்கச் சொல்வதற்கு விக்னேஸ்வரனுக்கு எந்த அருகதையும் கிடையாது. கிழக்கு முஸ்லிம்களின் தலைவிதியை அவர் தீர்மானிக்க முடியாது.

இந்த விடயத்தில் அகில இலங்கை மக்கள் காங்கிரஸ் மற்றும் அதன் தலைவர் ரிஷாத் பதியுதீனும் உறுதியான நிலைப்பாட்டில் இருப்பதுடன் அது தொடர்பில் ஜனாதிபதி மற்றும் பிரதமர் ஆகியோருடன் பேச்சுவார்த்தைகளை மேற்கொண்டு வருகின்றார் எனவும் கலாநிதி ஜெமீல் தெரிவித்துள்ளார்.