விமல் வீரவசவின் வீட்டிற்கு குண்டுத்தாக்குதல் நடத்தப்படும் – 119 இற்கு சென்ற அழைப்பு

தமிழ் ​செய்திகள் இன்று


விமல் வீரவசவின் வீட்டிற்கு குண்டுத்தாக்குதல் நடத்தப்படும் – 119 இற்கு சென்ற அழைப்பு

விமல் வீரவன்சவின் கொழும்பிலுள்ள இல்லத்தின் மீது குண்டுத்தாக்குதல் நடத்தப்போவதாக கிடைத்த அழைப்பை அடுத்து பொலிஸார் விசாரணைகளை பல கோணங்களில் ஆரம்பித்துள்ளனர்.

119 பொலிஸ்  அவசர இலக்கத்தின் ஊடாக, வெள்ளவத்தை பொலிஸ் நிலையத்திற்கு கடந்த 12ஆம் திகதி மாலை 03 மணிக்கு இவ்வாறு அழைப்பு மேற்கொண்ட நபர் ஒருவர், வெள்ளவத்தை, ஜோசப் ஸ்டான்லி மாவத்தையிலுள்ள அமைச்சர் விமல் தங்கியிருக்கும் இல்லம் மீது தாக்குதல் நடத்தப்போவதாக தெரியப்படுத்தப்பட்டது.

உடனே இதுகுறித்த விசாரணையை நடத்திய வெள்ளவத்தை பொலிஸார், சிம் அட்டை பதிவாகியுள்ளவரின் தகவலை பெற்றனர்.

யாழ்ப்பாணம் – வல்வெட்டித்துறையைச் சேர்ந்த சுதர்சன் என்பவரது பெயரில் இந்த சிம் அட்டை இருப்பது தெரியவந்த போதிலும் குறித்த நபருடன் பொலிஸார் நடத்திய விசாரணையில் ஜனவரி 13ஆம் திகதி தனது கையடக்கத் தொலைபேசி தொலைந்துவிட்டதாக பதிலளித்துள்ளார்.

இருந்த போதிலும் மேலதிக விசாரணைகளை பொலிஸார் தீவிரப்படுத்தி, தொலைபேசி தற்போது இருக்கின்ற இடத்தைக் கண்டுபிடித்தனர்.

அந்த இடம், ஹட்டன் – கொட்டகலை, திம்புள்ளபத்த என்கிற முகவரியை காட்டியுள்ளது. 119 அவசர இலக்கத்திற்கு வந்த எண்ணை மீள அழைத்தபோது தகாத முறையில் சந்தேக நபர் திட்டியிருப்பதாகவும் கூறப்படுகின்றது.

இதுசம்பந்தமான விசாரணைகள் துரிதமாக இடம்பெற்று வருவதோடு அமைச்சர் விமல் வீரவன்சவின் வெள்ளவத்தையில் மேற்படி முகவரியில் வீடொன்று இல்லை என்பதுவும் தெரியவந்துள்ளது.